Indraindray ianao solafaka raha tojo ny malama
Tsy fotsiny hoe lavo f'io namela ratra
Takaitra iray tavela am-po tsy mba voafafa
Handindona eny foana toa tsy hanam-piafarana

Niady ianao niady fa nandalo faharesena
Izay kinasa ho vita indrisy tsy tanteraka
Torotoro fo dia kivy sy ketraka
Sahy miantso tody sy manozona ny tena

Namakivaky sedra nanjohy ireo ala kitroka
Nanivatsiva tsilo ny ati-fo,fanahy
Nilavo anaty ady ny saina sahisahy
Tsy afa-namindra fa jambena sady ditsoka

Nandalo fahoriana,namoy ireo olona lalaina
Nibaby ranomaso t'anatin'ny hakiviana
Nanolotra ny tena ho niangaram-pifaliana
Dia nanome tsiny ilay nanolotra ny aina

F'ity tsarovy foana na ho inona fisiana
Na lala-mihosi-potaka na karazan'ady mafy
F'ireny rehetra ireny dia apinga sady vatsy
Lalan'ny mpandresy izay nilanja fahoriana

Dia sikino ny herin-tsaina bahano fahombiazana
Ny hilavo anaty ady ataovy fadin-drazana
N'iza handia tany tsy maintsy hoe maratra
Mpandresy foana hatrany fa mila anao mitraka
Dia mila anao mivavaka

Nosoratan'i Rina Mikalo